မြန်မာဂန္ထဝင် အတွဲ(၁၀၀) စာစဉ် ဝတ္တုရှည် အတွဲ ( ၁၊၂၊၃) စာအုပ်ထုတ်ဝေခြင်း အခမ်းအနားတွင် ပြည်ထောင်စုဝန်ကြီး ပြောကြားသည့် မိန့်ခွန်း

၃ ဒီဇင်ဘာ    

 

ပြန်ကြားရေးဝန်ကြီးဌာနအနေဖြင့် မြန်မာစာပေဖွံ့ဖြိုးတိုးတက်ရေး၊ မြန်မာနိုင်ငံတွင် စာအုပ်စာပေဖတ်ရှုသူများ တိုးပွားလာစေရေး၊ မြန်မာနိုင်ငံသားတို့ အသိပညာ ဖွံ့ဖြိုးတိုးတက်ရေးတို့အတွက် ရည်ရွယ်ပြီး စာတမ်းဖတ်ပွဲ၊ စာအုပ်ဈေးရောင်းပွဲများ ပါဝင်သည့် စာပေပွဲတော်များ ကျင်းပလျက်ရှိပါကြောင်း၊ အမြို့မြို့အနယ်နယ်ရှိ စာကြည့်တိုက်များတွင် စာဖတ်ဝိုင်း (Book Club) များ ထူထောင်ပြီး စာအုပ်စာပေကို လေးလေးနက်နက် ဖတ်ရှုသူများ၏ စာပေဆွေးနွေးဝိုင်းများအပြင် စာတွေ့လက်တွေ့ အသိရှိသူ၊ ဗဟုသုတရှိသူများ ဝိုင်းဖွဲ့ဆွေးနွေးသည့် ပြည်သူ့စကားဝိုင်းများ ထွန်းကားပြန့်ပွားရန် ဆောင်ရွက်လျက်ရှိပါကြောင်း။

 

နိုင်ငံအနှံ့အပြားတွင် ကျင်းပသည့် ကလေးစာပေပွဲတော်များနှင့် လူငယ်ဘက်စုံ ဖွံ့ဖြိုးရေးပွဲတော်များတွင် စာရေးသူများ ဦးဆောင်သည့် စာပေဆွေးနွေးဝိုင်းများ အမြဲထည့်သွင်းလျက်ရှိပါကြောင်း၊ စာပေသမား တစ်ဦးလည်းဖြစ်သည့် နိုင်ငံတော်၏အတိုင်ပင်ခံပုဂ္ဂိုလ် ကိုယ်တိုင်လည်း လူငယ်များနှင့် ရသ စာပေ ဆွေးနွေးဝိုင်းများတွင် ဦးဆောင်ပါဝင်ခဲ့သည်ကို အားလုံးသိရှိပြီးဖြစ်ပါကြောင်း၊  ဒီဇင်ဘာလကုန်ပိုင်းအတွင်း စာဖတ်သူတိုင်း စာဖတ်ရေး စည်းရုံးဆော်သြမည့် စာပေပွဲတော်အစီအစဉ်တစ်ရပ်ကို နေပြည်တော်တွင် ကျင်းပရန် စီစဉ်လျက်ရှိပါကြောင်း။

 

ပြန်ကြားရေးဝန်ကြီးဌာနအနေဖြင့် ယခုလို ပွဲများ၊ အစီအစဉ်များကို ကျင်းပပြု လုပ်နေသော်လည်း မိမိတို့ချည်းသာဆိုလျှင် ယခုလောက် မအောင်မြင်နိုင်ပါကြောင်း၊ ပညာရေးဝန်ကြီးဌာန၊ သာသနာရေးနှင့် ယဉ်ကျေးမှုဝန်ကြီးဌာန အပါအဝင် အခြားသက်ဆိုင်ရာ ဝန်ကြီးဌာနများ၊ ရန်ကုန်တိုင်းဒေသကြီး အစိုးရအပါအဝင် တိုင်းဒေသကြီး အစိုးရ၊ ပြည်နယ်အစိုးရတို့မှ ဝိုင်းဝန်းဆောင်ရွက်ကြသည့်အတွက် စာပေပွဲတော်များ စည်ကားသိုက်မြိုက်ခြင်း၊ ကျင်းပရသည့် ရည်ရွယ်ချက်များ ထမြောက်အောင်မြင်ခြင်း ဖြစ်သည်ဟု  ဤနေရာတွင် အလျဉ်းသင့်သဖြင့် ကျေးဇူးတင်စကားဆိုချင်ပါကြောင်း။

 

ပြန်ကြားရေးဝန်ကြီးဌာနအနေဖြင့် စာပေဆိုင်ရာအစီအစဉ်များကို ဆောင်ရွက်ရာတွင် ယခင်အစဉ်အဆက် ပုဂ္ဂိုလ်ကြီးများ ဆောင်ရွက်ခဲ့သည့် လုပ်ငန်းတာဝန်များကို ဆက်လက်ဆောင်ရွက်ခြင်းများ ရှိသကဲ့သို့ မိမိတို့လက်ထက် စိတ်ကူးကြံဆပြီး အသစ် ဆောင်ရွက်ခြင်းများလည်း ရှိပါကြောင်း။

 

နမူနာအနေဖြင့် စာပေဗိမာန် က ဆောင်ရွက်နေသည့် အစီအစဉ် နှစ်ခုကို တင်ပြလိုပါကြောင်း၊    စာပေဗိမာန်သည် အမှောင်ခွင်း၍ အလင်းဆောင်အံ့ဆိုသည့် ဆောင်ပုဒ် နှင့်အညီ ပြည်သူလူထုကို အလင်းရောင်ပေးနိုင်ရန်အတွက် မြန်မာ့စွယ်စုံ ကျမ်း၊ လူထုသိပ္ပံ ကျမ်းစသည့် ရည်ညွှန်းကျမ်းကြီးများအပါအဝင်  စာအုပ်စာတမ်းများ စွာ ပြုစုထုတ်ဝေပေးခဲ့ပါကြောင်း၊ ၁၉၅၀-၆၀ ကျော်ကာလ  စာပေဗိမာန်၏ ဆောင်ရွက် နိုင်မှုစွမ်းရည်သည် ကြီးမားခဲ့ပါကြောင်း၊ စာပေဗိမာန်၏ ကနဦးကာလ ဆောင်ရွက်ချက် များထဲမှ တစ်ခု ဖြစ်သည့် မြန်မာ့စွယ်စုံကျမ်းကြီးကို ပြန်လည်တည်း ဖြတ်ပြင်ဆင်ဖြည့်စွက် ပုံနှိပ်ထုတ်ဝေနိုင်ရန် မိမိတို့ကြိုးပမ်း လျက်ရှိပါကြောင်း။

 

မြန်မာ့စွယ်စုံကျမ်းကြီးသည် ၁၉၅၀ ကျော်နှစ်များတွင် စတင်ပြုစုခဲ့ပြီး ၁၉၆၀-၁၉၇၀ ကျော်နှစ်များအတွင်း ပုံနှိပ်ထုတ်ဝေပြီးစီးခဲ့ပါကြောင်း၊ ဤစွယ်စုံကျမ်းကြီးသည် မြန်မာတို့အတွက် ဂုဏ်ယူဖွယ်ရာဖြစ်သလို ယနေ့ အထိလည်း ရည်ညွှန်းကိုးကားရ ဆဲဖြစ်ပါကြောင်း၊ သို့သော် သက်တမ်းအားဖြင့် နှစ်ပေါင်း ၅၀၊ ၆၀ ကြာမြင့်ခဲ့ပြီဖြစ် သောကြောင့် အကြောင်းအရာ အချက်အလက် များ ပြောင်းလဲကာ အသစ်ဖြစ်ထွန်း ပေါ်ပေါက်သည်များကို ဖြည့်စွက်ရန် လိုအပ်နေပါကြောင်း၊ ယင်းလိုအပ်ချက်ကို ဖြည့် ဆည်းရန် မိမိတို့ကို ကူညီဆောင်ရွက်ပေးဖို့ စာပေ စေတနာပြည့်ဝစွာ ကမ်းလှမ်းလာသည့် ထွန်းဖောင်ဒေးရှင်းနှင့် ပုံနှိပ်ရေးနှင့် ထုတ်ဝေရေးဦးစီးဌာန စာပေဗိမာန် စာတည်းအဖွဲ့တို့ ပူးပေါင်းပြီး ခေတ်မီ မြန်မာ့စွယ်စုံကျမ်းသစ်ကြီး ပြုစုသည့်လုပ်ငန်းကို ဆောင်ရွက်လျက်ရှိပါကြောင်း၊ များမကြာမီ မြန်မာ့စွယ်စုံကျမ်း ပထမတွဲကို ယခုကဲ့သို့ မိတ်ဆက်ဖြန့်ချိနိုင်ရန် မိမိတို့ မျှော်လင့်ထားပါကြောင်း။

 

စာပေဗိမာန်အနေဖြင့် ယခင် မဆောင်ရွက်ဖူးသေးသည့် အစီအစဉ်တစ်ခု ယခုအခါ စတင် ဆောင်ရွက်လိုက်သည်မှာ ယနေ့ မိတ်ဆက်ပွဲပြုလုပ်သည့် မြန်မာဂန္ထဝင် အတွဲ ၁၀၀ စာစဉ် ဖြစ်ပါကြောင်း။

 

ဤစာစဉ်တွင်မြန်မာစာပေပေါ်ဦးစမှ ခရစ်နှစ် ၂၀၀၀ ပြည့်နှစ်အထိ ကာလအတွင်း ပေါ်ထွန်းခဲ့သည့် မြန်မာစာပေလက်ရာများစွာထဲမှ အထူးခြား အပြောင်မြောက်ဆုံး လက်ရာများ၊ ခေတ်အဆက်ဆက် မြန်မာစာပေလောကသားများ ဖတ်ရှုမှတ်သားခဲ့ရသည့် စာအုပ်စာတမ်းများ၊ ခေတ်အသီးသီးတွင် ကြီးကြီးမားမား လွှမ်းမိုးတွင်ကျယ်ခဲ့ သလို ယနေ့ခေတ်စာပေလေ့လာသူများလည်း ဖတ်ရှုနေဆဲ စာပေများ၊ ယင်းတို့ကို ရွေးချယ်စုစည်းပေးရန် ဖြစ်ပါကြောင်း။

 

မိမိတို့ ဤစာစဉ်ပြုစုထုတ်ဝေရသည့်ရည်ရွယ်ချက်မှာ   မြန်မာစာပေ သမိုင်း တစ်လျှောက် ပေါ်ပေါက်ခဲ့သည့် စာအုပ်စာပေများစွာထဲမှ အထူးခြားဆုံး၊ အကောင်းဆုံး လက်ရာများကို ရွေးချယ်စုစည်းပေးခြင်းအားဖြင့် နောင်လာမည့် အဆက်ဆက်သော မျိုးဆက်သစ်များအနေဖြင့် မြန်မာစာကောင်းပေမွန်များကို အလွယ်တကူ ထိတွေ့ ခွင့်ရပြီး ယင်းစာပေများမှ ပေးသည့် သုတ၊ ရသများကို ခံစားရရှိခြင်းနှင့်အတူ မြန်မာစာ မြန်မာမှုတို့အပေါ် နှစ်သက်မြတ်နိုးစိတ်များလည်း ၎င်းတို့မှာ ကိန်းအောင်းဖြစ်ပေါ်စေရန်နှင့်  ရှေးအစဉ်အဆက် ရှိခဲ့သည့် မြန်မာတို့၏ ဘဝအတွေ့အကြုံ အသိပညာ၊ ဗဟုသုတ၊ မြန်မာ့ဉာဏ်၊ မြန်မာ့အတွေးအခေါ်၊ မြန်မာတို့၏ စိတ်နေစိတ်ထား စဉ်လာလက္ခဏာ၊ မြန်မာ့ယဉ်ကျေးမှု၊ မြန်မာ့ထုံးဓလေ့စဉ်လာများ၊ မြန်မာဘာသာ စကားနှင့် မြန်မာစာပေအဆင့်အတန်းများကို လေ့လာအကဲခတ်လိုသည့် နိုင်ငံတကာ သုတေသီများအတွက် လေ့လာစရာ ပစ္စည်းများအဖြစ် အသင့် ပြင်ဆင်ပေးရန် ဆိုသည့် ရည်ရွယ်ချက်တို့ ဖြစ်ပါကြောင်း။

 

သို့သော် ယင်းရည်ရွယ်ချက်နှစ်ရပ် ဖြစ်မြောက်စေမည့် စာစဉ်တစ်ရပ် ပြုစုရန်မှာ  စိတ်ကူးရလွယ်သော်လည်း တကယ့်လက်တွေ့အကောင်အထည်ဖော်ရာတွင် အများဝိုင်းဝန်းပြီး အားထုတ်ကြိုးပမ်းရပါကြောင်း၊ စာပေဗိမာန် တစ်ခုတည်း၊ ပြန်ကြားရေးဝန်ကြီးဌာန တစ်ခုတည်း လုပ်၍မရပါကြောင်း၊  ထို့ကြောင့် ဆရာကြီး ဦးသော်ကောင်း ဥက္ကဋ္ဌအဖြစ် ဆောင်ရွက်သည့် မြန်မာဂန္ထဝင် ၁၀၀ စာစဉ် ထုတ်ဝေရေး ကော်မတီကို ထိုစာစဉ်ကိစ္စအား စိတ်ပါဝင်စားသည့် စိတ်အားထက်သန်စွာ ဦးစီးဆောင် ရွက်ပေးမည့် စာပေပညာရှင်များ၊ ကျွမ်းကျင်သူများနှင့် ဖွဲ့စည်းခဲ့ပါကြောင်း၊ ဝတ္ထုတို၊ ဝတ္ထုရှည်၊ ကဗျာ၊ ပြဇာတ် စသည်ဖြင့် ကဏ္ဍအသီးသီးမှ ဂန္ထဝင် လက်ရာမွန်များ  ရှာဖွေ စိစစ်ရွေးချယ်ပေးမည့် ပညာရှင်များအား ဖိတ်ခေါ်ပြီး ကဏ္ဍအလိုက် ဖွဲ့စည်းခဲ့ ပါကြောင်း။ 

 

ယင်းဂန္ထဝင်စာစဉ် ပီပီသသဖြစ်ပေါ်စေရေး၊ အပြစ်အနာအဆာ အနည်းဆုံး၊ တတ်နိုင်သမျှ အကောင်းဆုံး စာစဉ်ဖြစ်စေရေးတို့အတွက် စာပေစိတ်စေတနာ ပြည့်ဝစွာ  ကူညီဆောင်ရွက်ပေးကြသည့် ပုဂ္ဂိုလ်များ အားလုံးကို ကျေးဇူးတင် ဂုဏ်ပြုမှတ်တမ်းတင်ပါကြောင်း။

 

ဤဂန္ထဝင်စာစဉ်သည် ယခုမှ စတင်ခြင်းဖြစ်သည့်အတွက် ရှေ့ဆက်ပြီး ဆောင်ရွက်ရန်  အများကြီး ရှိပါသေးကြောင်း၊ ဒီစာစဉ်ပြီးမြောက်အောင်မြင်ရေးနှင့် ပြည့်စုံကောင်းမွန်ရေးသည် စာပေပညာရှင်ကြီးများ၏ အကြံပြုလမ်းညွှန်မှုနှင့် မိမိ ဆောင်ရွက်ပေး နိုင်သောကဏ္ဍမှ ကိုယ်တိုင်ကိုယ်ကျ ပါဝင်ဆောင်ရွက်ပေးမှုများ အပေါ်တွင် အဓိက မူတည်နေခြင်းဖြစ်သည့်အတွက် ဆက်လက်ဝိုင်းဝန်း ကူညီဆောင်ရွက်ပေးကြရန် မေတ္တာရပ်ခံပန်ကြားလိုပါကြောင်း ပြောကြားသည်။  

 

Share this on Social Media